Tiu ĉi simple eldonita (nadloprintita) broŝuro enhavas aŭtoran antaŭparolon kaj sep mallongajn verkojn. „La Botelo”, doninte la nomon al la tuta libreto, estas kortuŝa novelo pri la suferoj de familio de alkoholulo. „Tamen la suno denove brilas” estas alia kontraŭalkohola rakonto. Kvar mallongaj eseoj temas pri hazarda renkonto kaj ekamo de junuloj, pri malsato de malliberuloj, pri anekdota situacio kun nova seruro por malnova aŭto kaj pri travivaĵo per la publika transporto. Finas la esearon preskaŭ neimagebla rakonto pri la tempo de la dua mondmilito, kiam du junaj malamikoj (ha-zarde kaj preskaŭ kontraŭvole) mortigas unu la alian.
Ne ĉiuj rakontoj estas egalvaloraj. La aŭtoro kapablas rimarki, kaj priskribi, apartajn, ofte amuzajn, okazaĵojn de l’ ĉiutaga vivo, pri kio tiel forta estis Anton Ĉeĥov. Facila kaj simpla lingvaĵo permesos eĉ al komencantoj ĝui la legadon.
