MONATO havas 200 kunlaborantojn
en 40 landoj. Sed neofte aŭtoroj de
MONATO aperigas siajn verkojn en libro. Matjaso Wnuk estas kunlaboranto de 1986. Pluraj el liaj artikoloj aperintaj en MONATO (sed ankaŭ en „Pola
Stelo" kaj en „Kontakto”) aperis nun libroforme sub la titolo „Ne nur pri komunismo”. Efektive, ties enhavo estas
tre bunta kaj varia: la aŭtoro tre interese priskribas ne nur la eventojn de
sia patrolando Pollando (pri konspira
radio, pri interna situacio, pri ekologio
ktp.) sed ankaŭ pri Sovetio, Jugoslavio, Afganistano, Vjet-Namo ktp. El
la artikolaro oni ekscios ankaŭ pri naciecaj problemoj en mez-orienta
Eŭropo, pri historio de milito en etero,
pri ĝusta maniero legi propagandilojn,
pri cenzuro en ĵurnalismo ktp. Tamen,
kvankam la aŭtoro provis skribi tiel, ke
la artikoloj ne malfreŝiĝu rapide, bedaŭrinde nia nun vere galopanta vivo
rapide faras historiaĵojn el multaj
situacioj. Cetere tio neniel malaltigas
kvalitojn de la libro. La tekston bone
suplementas spritaj ilustraĵoj de Andrzej Mleczko.
